वसंत ऋतूबरोबरच निसर्ग फुलून येतो. सोनचाफा, मोगरा यासारखी सुवासिक फुले या ऋतूत वातावरण सुगंधित करतात. उन्हाळा असल्यामुळे या फुलांमधील सुवासिक रेणू वातावरणात लवकर आणि दूरवर पसरतात. वातावरण प्रसन्न व आल्हाददायक बनते. उन्हाळ्याच्या तापामुळे कोमेजलेल्या मनाला या सुवासिक फुलांमुळे टवटवी येते. 

    भारतीय सण उत्सव कायमच ऋतुबदल या मुख्य संकल्पनेवर आधारलेले दिसून येतात. या ऋतूबदलातील आहार नियोजनाचे प्रतिबिंब या सणांच्या खाद्यपरंपरेतून दिसून येते. शास्त्रीय दृष्टीने विचार केला तर प्रत्येक ऋतूमधील आहारातील घटक, पोषकद्रव्ये त्या ऋतूनुसार उपयुक्त असेच असतात.